Cultura aplaza la Selmana de les Lletres Asturianes hasta el próximo Otoño

PUBLICIDAD

La Conseyería de Cultura, Política Llingüística y Turismu, al traviés de la Dirección Xeneral de Política Llingüística, anunció l’aplazamientu hasta la seronda próxima de la 41 edición de la Selmana de les Lletres, prevista, como ye tradición, pa ser celebrada a primeros del mes de mayu, coincidiendo col Día de les Lletres Asturianes.

El Gobiernu d’Asturies, de común alcuerdu cola Academia de la Llingua Asturiana (ALLA), considera que la situación actual de la crisis del coronavirus, tres la declaración del estáu d’alarma y el decretu de les midíes de confinamientu, aconseya l’aplazamientu de los actos previstos pa la celebración de la Selmana de les Lletres Asturianes hasta la seronda, en feches que van marcase y anunciase más alantre.

El Gobiernu asturianu taba trabayando pa desenvolver la programación de la Selmana de les Lletres Asturianes ente los díes 4 y 8 del mes de mayu, coincidiendo cola celebración el día 8 de mayu del Día de les Lletres Asturianes por parte de l’Academia de la Llingua Asturiana, que tamién foi retardáu hasta la seronda viniente. La institución académica celebra nesa xornada la so xunta extraordinaria anual con un actu solemne nel Teatru Campoamor d’Oviedo/Uviéu, onde s’entrega’l Premiu Nacional de Lliteratura, que nesta convocatoria foi otorgáu al escritor Xuan Xosé Sánchez Vicente.

PUBLICIDAD

Nesta ocasión, la Selmana de les Lletres Asturianes que se conmemora anaulamente dende 1980, ta dedicada a recuperar la figura de la escritora María Teresa Villaverde (1881-1934), popularmente conocida col seudónimu de Tuxa. Ente otros actos, el programa incluye la celebración del tradicional Día del Llibru y de la Música n’asturianu y gallego-asturianu.  

Esti aplazamientu garantiza la organización y normal celebración de la principal cita anual de la lliteratura escrita n’asturianu y en gallego-asturianu.